Nakumpiskar sang kapulisan ang masobra P400,000 nga balor sang ginapasuni shabu sa ginpatigayon nga drug buy-bust operation sa Barangay 8, San Miguel Public Market, San Miguel, Iloilo sang Agosto 18.
Nadakpan sa operasyon ang suspek nga ginkilala sa alyas nga “Joshua,” isa ka high-value individual kag residente sang Pavia, Iloilo.
Suno kay Police Major Bryan Alejo, hepe sang San Miguel Municipal Police Station, iya ginpahayag nga isa ka sachet sang iligal nga droga nga gin-seal kag walo ka heat-sealed transparent sachets ang nakuha sa suspek.
Narekober man sang kapulisan ang buy-bust money nga nagabalor sang kapin P2,500 kag isa ka Yamaha Mio scooter.
Suno kay Alejo, isa na ka bulan nga ginamonitor sang kapulisan ang suspek.
Apang nangin mabudlay ang pagdakop sa iya bangud sa iya “dead drop” modus, kun sa diin ginahulog lamang niya ang ginbakal nga droga kag online naman ginabayran sang buyer.
Ginpaidalom naman ang suspek sa inquest proceedings kag ginpasakaan sang kaso sa Iloilo Provincial Prosecutor’s Office bangud sa paglapas sa Section 5 kag Section 11 sang Republic Act No. 9165 ukon Comprehensive Dangerous Drugs Act of 2002.
