ILOILO CITY – Masobra sa 100 ang pending COVID-19 results nga ginahulat sang Department of Health 6.
Ini ang kasunod sang pagtaas sang kaso sang Coronavirus Disease 2019 (COVID-19) sa Western Visayas sa 30.
Sa interview sang Bombo Radyo kay Dr. Mary Jane Juanico, pinuno sang Infectious Disease Section sang Department of Health 6, iya ginpahayag nga ginalauman nga maga-abot sa masunod nga inadlaw ang test results sang Persons Under Investigation.
Sa subong suno kay Juanico nga may nagdugang nga lima ka kumpirmado nga kaso, magapabilin ang pagpatuman sang hugot nga Enhanced Community Quarantine sa tagsa ka lugar sa rehiyon.
Magluwas diri, may ginapatigayon man nga ika duha nga hugnat sang contact tracing agud nga malimitahan ang local transmission.
Ang apat ka COVID-19 positive sa Lambunao, Iloilo suno kay Juanico ang nagapabilin nga asymptomatic kag nagapaidalom sa home quarantine samtang ang Local Government Unit na ang magahatag sang update sa Department of Health.
Sa mga nakabatyag sang sintomas sang COVID-19, mas makapaayo suno sa natungdan nga magpadulong gilayon sa Municipal Health Office para sa nagakaigo nga bulig.
