Apisar nag-upod sa rescue operations sa kasagsagan sang paglaslas sang Bagyo Carina, wala nakaluwas si Malabon Mayor Jeannie Sandoval sa pagpakamalaot sang iban nga netizens.
Nakit-an mismo sa post sang alkalde ang pila sa pictures sini nga nagasakay sa rescue boat kag ginapayungan sang rescuers samtang nga mabaskog ang pagbubo sang ulan.
Bangud sa pag-bash sang publiko kun sa diin ginpasibangdan pa si Sandoval nga nagpa-“photo op” apisar nga gina-anaw na ang syudad, ginkakas na ang pictures sa iya social media account subong nga Huwebes, Hulyo 25.
Lakip sa mga komento ang naglaragway kay Sandoval nga “Disney Princess.”
“Imbis na yung irerescue yung isakay”, “Ay Disney Princess pala hahaha”, “Libreng PR na rin, kayo naman, di na kayo nasanay…”, “Mayora, sana hindi na lang po kayo sumama, kaya na yan ng mga tauhan mo po. Para kasing intindihin pa po kayo hehe,” kabahin sang mga nagbilin sang komento.
Nag-depensa naman ang opisyal nga para lang sa iya trabaho ang amo nga mga laragway.
Ginsaysay man sini nga lakip sa ila na-rescue amo ang duha ka nagabusong nga babaye nga manugbata na kag kinahanglan idalagan sa ospital.
“Habang nagpapatuloy po sa pag-iikot ang ating emergency response team, sinaklolohan po natin ang isang buntis at kaagad dinala ito sa Ospital ng Malabon upang mabigyan agad ng atensiyong medical,” pahayag sini sa isa ka Facebook post.
Sang ginpamangkot naman sang iya reaksyon sa mga komento sa iya, nagsabat ang alkalde: “Kung maayos naman ‘yung comment e ‘di okay lang. Pagka hindi naman maayos, hindi ko na lang po pinapansin.”
Kaina sang aga sang nagguwa na ang Bagyo Carina sa Philippine Area of Responsibility apang ginalauman ang pag-ulan-ulan tubtub sa Sabado bangud gihapon sa Habagat.
