Personal nga nagpadulong si Iloilo City Mayor Raisa Treñas sa Jaro Plaza, matapos ang ginapahayag naglabay nga buhawi sa siudad sang Iloilo, kagab-i, Agosto 8.
Ini matapos nga isa sa mga labing naapektuhan sang mabaskug nga hangin ang plaza kun sa diin nagkalatumba ang mga puno, kag napalid naman ang iban nga mga gamit sang food vendors sa lugar.
Suno kay Mayor Treñas pinaagi sa iya Facebook live, nagalibot ang mga personnel sang siudad kaangay sang City Disaster Risk Reduction and Management Council kag mga volunteers, agud mahatagan sang bulig ang mga apektado nga mga pumuluyo.
Ginpakigbahin man sang alcalde nga ginbuksan man ang mga evacuation centers sa mga barangay nga naka-eksperyensya sang mabaskug nga hangin.
Naghatag man sang pasalig si Treñas nga siguraduhon sang Iloilo City Government nga magbalik sa normal ang siudad matapos ang buhawi.
