Ginpirmahan na ni Iloilo City Mayor Raisa Treñas ang Executive Order No. 030 nahanungod sa ginpapanaog nga Memorandum Circular No. 114 halin sa Office of the President nga may tinutuyo nga ipatuman sa pungsod ang 4-day workweek arrangement nga para man sa energy conservation bangud sa pagtaas sang presyo sang gatong sa nagapadayun nga tenyson sa Middle East.
Sa interview sang Bombo Radyo kay Joy Fantilaga-Gorzal, Spokesperson ni Mayor Treñas, iya ginpahayag nga nagpatawag ang alcalde sang isa ka emergency meeting sa mga Department Heads agud isturyahan ang nasambit nga alternative arrangement para sa mga empleyado sang siudad.
Suno kay Gorzal, yari ang mga magapabilin sa orihinal nga arrangement:
Health Services
Iloilo City Social Welfare and Development Office
Iloilo City Public Order and Safety Management
Traffic and Transportation Management Office
Iloilo City Disaster Risk Reduction and Management Office
Iloilo City Local Economic Enterprise Office (LEEO)
Office of the City Treasurer
Business Permits and Licensing office
kag iban pa nga mga opisina nga nagahatag sang essential services
Dugang pa ni Gorzal nga sa amo nga Executive order ni Mayor Treñas, ila pagasiguraduhon nga indi maapektuhan ang pila ka mga operation sang siudad sa idalom sang igapatuman nga 4-day workweek arrangement.
