ILOILO CITY- Nakahanda maghatag si Iloilo City Mayor Jerry Treñas sang ₱100,000 nga burial assistance para sa pamilya sang duha ka mga biktima nga napatay sa sunog sa Brgy. San Nicolas, La Paz, Iloilo City.
Sa interview sang Bombo Radyo kay Mayor Jerry Treñas, iya ginpahayag nga ginapalantaw niya sa City Social Welfare and Development Office ang iban pa nga mahimo mabulig sang Iloilo City Government.
Suno kay Treñas, moral responsibility sang siyudad ang pagbulig sa mga apektado nga boarders apisar indi mga residente sang siyudad ang mga ini.
Ang mga patay amo sanday Renz David Aguilar, 22, nga isa ka civil engineering student sa syudad kag residente sang banwa sang Concepcion; kag si Lyn Rose Sobretodo, 26, nga call center agent kag residente sang banwa sang Pototan.
Nagmando naman ang alkalde sang mas hugot nga inspeksyon sang Boarding House Commission sa siyudad ilabi na ang mga malapit sa mga eskwelahan.
Mahimu naman kaksan sang business permit ang boarding house pananglitan mapamatud-an nga wala ini sang ginauyatan nga business permit kag indi na liwat paghatagan.
