ILOILO CITY – Pursigido si Iloilo City Mayor Jerry Treñas nga bawion ang Executive Order 146 ukon Liquor ban sa Syudad sang Iloilo.
Ang EO 146 nagamando sang pagpasirado sang tanan nga bars, night clubs, disco bars, resto bars kag iban nga establisimento nga nagabaligya sang makahulubog nga ilimnon paglampas sang alas-dos sa kaagahon.
Sa interview sang Bombo Radyo Iloilo kay Treñas, iya ginpahayag nga wala sang problema sa kalinong kag katawhay sa Syudad sang Iloilo gani wala sang rason nga dumilian ang mga pumuluyo nga mag-inom kag magkinasadya.
Suno kay Treñas, nagakadapat nga hatagan ang tanan sang ligwa ukon sang kahigayunan nga mangin hilway ukon mag enjoy sang ginatawag nga liberty.
Ginpaanggid man sang alkalde ang sitwasyon sa Manila, Caloocan, Makati, Pasay, Quezon City kag sa iban pa nga mga highly urbanized city sa diin wala sang curfew apang mauswag sa gihapon kag napabilin ang seguridad.
Ginpahayag sang alkalde nga wala man sang presensya sang New People’s Army (NPA) sa syudad sang Iloilo gani wala sang rason nga magpatuman sang curfew.
Ginatugyan naman sang alkalde sa Philippine National Police ang katungdanan sa pagpabilin sang peace and order sa syudad.
Nahibaluan nga pila sa mga rekisitos sa pagbawi sang Executive Order 146 amo nga nagakadapat nga magpahamtang ang mga establisyemento sang close circuit television (CCTV) camera kag magdugang sang bouncer kag security personnel.
Magluwas sini, indi man mahimo baligyaan ang mga menor de edad kag tuman ka hubog na customer sang makahulubog nga ilimnon.
