Patay ang isa ka mekaniko matapos nga naatrasan sang isa ka elf truck sa Barangay Badiang, Anilao, Iloilo.
Ang biktima amo si Ruel Borlado, 41, residente sang Purok 1, Aldeguer, Sara.
Sa interview sang Bombo Radyo kay Police Staff Sergeant Rogelio Amador, imbestigador sang Anilao Municipal Police Station, iya ginpahayag nga natabo ang insidente sang naaberya ang isa ka dropside truck sa amo nga barangay kun sa diin nagresponde ang elf truck agud nga maguyod ini.
Nakaplastar ang biktima sa tunga sang duha ka truck bangud mainit sang amo nga tion suno sa imbestigador.
Base sa imbestigasyon, ginpaandar na ang elf truck kag sa baylo nga mag-abante, nag-reverse ini ukon hinali nga nag-atras kag naipit gid ang mekaniko nga yara sa tunga sang duha ka truck.
Ginhingagaw pa dala ang mekaniko sa Barotac Nuevo Hospital apang ginbawian gid sang kabuhi bangud sa patal nga pilas sa ulo.
Gindala naman sa kustodiya sang pulis ang 30-anyos nga si alias Piay nga amo ang nag-drive sang elf truck kag nakaatras sa biktima.
