Natukod na ang mga bag-o nga apartment-type niches kag bone boxes sa Tanza Public Cemetery.
Kabahin ini sang Phase I rehabilitation project nga ginpondohan sang Iloilo City Government sang P5 milyon.
Sa interview sang Bombo Radyo kay Alyas Nonoy, isa sa mga nagadumala sang proyekto, iya ginpahayag nga nagsugod ang konstruksyon sang Hulyo 21 kag target sini nga makompleto ang 320 ka mga compartment.
Nagalakip ini sang 40 ka apartment-type niches para sa fresh dead bodies kun sa diin may walo ini ka lebel kag 280 ka bone boxes nga may pito naman ka lebel para sa pagasayluhan sang mga tul-an.
Suno pa kay Alyas Nonoy, ginpatigayon ang proyekto agud mapalapad pa ang kapasidad sang Tanza Public Cemetery kag makahatag sang mas desente nga hamtangan para sa mga minatay.
Samtang, ginpahayag man ni Iloilo City Mayor Raisa Treñas nga kabahin ini sang “from womb to tomb” program sang administrasyon nga nagatuyo nga maghatag sang serbisyo sa mga Ilonggo halin sa pagbun-ag tubtob sa katapusan sang kabuhi.
Dugang pa ni Treñas, indi lamang sa tion nga buhi ang mga pumuluyo dapat ginaserbisyuhan sang gobyerno kundi pati man sa ila katapusan nga pagpahuway.
Kabahin man sang rehabilitasyon ang pagkuha sang mga tul-an kag pagdemolish sang mga daan kag delikado na nga mga estruktura agud madugangan ang lugar para sa bag-o nga apartment-type niches kag bone boxes.
Ginpahayag man ni Treñas nga sunod nga target sang siyudad para sa rehabilitasyon amo ang Quintin Salas Public Cemetery kag Jereos Public Cemetery.
By: Bombo Cyrene Nasis
