Ginapanugyanan sang Liga ng mga Barangay president ang tanan nga mga barangay tanod sa syudad nga likawan ang pagresponde sa mga gamo nga may yara nga makahalalit nga mga armas kag sa baylo, hulaton gid ang kapulisan.

Madumduman nga isa ka Deputy Chief Tanod ang natiruhan kag napatay sa Barangay Cubay, Jaro matapos nga magresponde sa gamo sa isa ka birthday party kun sa diin natiruhan ini sang suspek nga taga-Cebu.

Sa interview sang Bombo Radyo kay ex-officio City Councilor Irene Ong, president sang Liga ng mga Barangay sa Iloilo City, iya ginpahayag nga may kaangtanan ang ini nga panugyan sa pagsulundan nga ginpatuman sang Department of Interior and Local Government (DILG) nga Memorandum Circular No. 2024-086.

Ang nasambit nga pagsulundan nagatalana nga ang mga Barangay tanod gina-dumilian sang layi sa pagdala sang mga nakahalalit nga mga armas, kag ang ginatugutan lamang amo ang batuta, posas, pito, flashlight kag mga walkie talkie.

Dugang pa niya, dapat nga siguraduhon nga usisaon gid ang palibot sang lugar kun sa diin nagluntad ang isa ka gamo kun may posibilidad nga may armas ang mga indibidwal nga nadalahig sa inaway.

Ginpahanumdom man ni Ong nga indi dapat pag-ibutang sang mga tanod ang kaugalingon sa mga delikado nga sitwasyon, ilabi na kun ang mga hitabo nagakinahanglan na sang kapulisan.