ILOILO CITY – Nagkalain-lain ang reaksyon sang mga pumuluyo sa syudad sang Iloilo may kaangtanan sa pagbasura sang korte suprema sa same sex marriage sa pungsod.
Sa interview sang Bombo Radyo kay Jeanny Rose, isa ka vendor, iya ginpahayag nga malain sa panan-awan nga may yara sang duha ka lalaki ukon duha ka babayi nga nagapakasal.
Suno kay Jeanny Rose, babayi kag lalaki lamang ang mahimo nga magpakasal santo sa bibliya.
Ginpahayag naman ni Leni Salazar, isa ka vendor, nga mas manami ang pag-angkon sang relasyon sa isa ka tomboy ipaanggid sa lalaki.
Suno kay Salazar, ang tomboy ang daw kaangay man sang lalaki bangud sa ila panghulag apang mas makabig nga “gentleman” ang tomboy.
Nanugunan ang isa ka lesbian matapos ginbasura ang petisyon para sa Same Sex Marriage.
Sa interview sang Bombo Radyo kay alyas Nene, 20 anyos, iya ginpahayag nga nagakadapat nga batunon na lang ang nangin desisyon sang Korte Suprema.
Kun para sa iya personal nga pamat-od, mas makapaayo suno kay alyas Nene kun napasar bilang layi ang nasambit nga petisyon.
Ginpahayag ni alyas Nene nga sa subong, wala siya sang plano nga magpakigrelasyon sa mga lalaki apang sa ulihi, gin-ako sang natungdan nga plano niya nga magpamana sa ulihi agud nga maka-angkon sang kaugalingon nga pamilya.
Pabor naman ang vendor nga si Bert Navaja, nga ginbasura ang Same Sex Marriage.
Suno kay Navaja, ang babayi ang para sa lalaki kag ang lalaki ang para lang sa babayi.
Ginpahayag ni Navaja nga kalaw-ay tulukon nga ang duha ka lalaki ukon duha ka babayi ang nagapakasal bangud makabig ini nga paglapas sa bibliya.
