Ginpangkuha na ang mga kagamitan halin sa opisina ni House Speaker Martin Romualdez subong nga gab-i, Septyembre 16.
Lakip sa nakit-an nga ginkakas amo ang iya nga desk nameplate.
Ginhimo ini sa tunga sang matunog nga huring-huring nga may matabo nga pag-ilis sang liderato sa Kamara buwas, Septyembre 17.
Base sa pila ka House sources, magasapol ang ruling party nga Lakas 2:00 sa hapon buwas kun sa diin ginalantaw nga magapaguwa sang formal announcement si Romualdez kaangot sa iya nga resignation.
May mga impormasyon naman nga si Deputy Speaker Faustino “Bojie” Dy III nga halin sa Isabela amo ang magabulos sa posisyon.
Antes sa 20th Congress, nakaserbe siya anay sa Kamara halin sang 2001 tubtub sang 2010; nakapungko bilang gobernador sang Isabela sang 2010 tubtub 2019, kag nangin vice governor sang 2019 tubtub sini nga 2025 antes ini nagbalik sa lower chamber.
Myembro siya subong sang Partido Federal ng Pilipinas (PFP) ni President Ferdinand “Bongbong” Marcos, Jr.
Magluwas sa iya, nagtuhaw man ang pangalan sang apat ka iban pa nga mga kongresista nga magabulos sa pagka-House Speaker nga amo sanday Deputy Speaker Rand Antipolo Rep. Ronaldo Puno, Cebu Rep. Duke Frasco, Navotas Rep. Toby Tiangco, kag Bacolod Rep. Albee Benitez.#
