ILOILO CITY – Ginpanghaboy nalang sang mga mangunguma sa Nueva Vizcaya ang na-ani nga kamatis bangud sang sang madamo nga suplay nga nagresulta sa ila pagkalugi.
Ang presyo sang kamatis sa lugar ang yara sa P8 tubtob sa P12 ang kada kilo.
Suno sa uploader nga si Vivian Faye Baluca Fermantez, nagikan sa Nueva Vizcaya Agricultural Terminal ang mga kamatis kag ginhaboy nalang agud nga indi madunot sa pwesto sang mga mangunguma.
Ang iban diri ang ginpanghatag na sa palibot.
Sa subong, gina-imbestigaran na sang Department of Agriculture kun may oversupply sang kamatis.
Suno kay Agriculture Asec. Kristine Evengelista, nagapangita na ang ahensya sang manugbakal kag naga-enganyo sa mga mangunguma nga magsulod sa contract farming agud nga indi ma-uyang ang ani.
