Nag-comply na ang Western Visayas Transport Cooperative ukon WVTC sa mandu sang Land Transportation Office (LTO) nga ang mga Public Assistance Officer ukon PAO sang modernized buses ang kinahanglan may yara sang conductor’s license.
Sa interview sang Bombo Radyo kay WVTC Chairman Armondo “Boyet” Parcon, iya ginpahayag nga ginpa-seminar na nila ang ila nga mga PAO sa LTO kada Miyerkules nga adlaw bilang kabahin sang proseso sa pagkuha sang nasambit nga lisensya.
Suno kay Parcon, kinahanglan nga makakuha anay sang conductor’s license ang isa ka indibidwal antes ang ini makatrabaho sa bilang kundoktor sang modernized bus agud nga malikawan ang violation kun ma-check ang LTO.
Ginpahayag man niya nga sa subong, tanan na nila nga mga konduktor ang napaidalum na sa seminar kag may yara na sang mga lisensya.
Dugang pa ni Parcon, kabahin man sang training sang ila mga personnel amo ang husto nga pag-atipan sa mga pasahero, ilabi na ang mga senior citizen kag Persons with Disabilities ukon PWDs.
