Sarang na nga makabaton ang mga kwalipikado nga myembro sang PhilHealth sang libre nga mga bulong bilang benefit package sa idalom sang Yaman ng Kalusugan Program (YAKAP).
Suno kay Marjorie Cabrieto, PhilHealth Regional Vice President sang Western Visayas, iya ginpahayag nga masobra P280 milyon na ang ginbayad sang PhilHealth sa healthcare providers para sa first patient encounters halin Enero 1 tubtob Hunyo 30, 2026.
Kabahin sang YAKAP ang konsultasyon, laboratory kag diagnostic tests amo man ang 75 ka essential medicines.
Sa 75 ka bulong, 54 ang ma-access paagi sa GAMOT providers, samtang 21 ang makuha sa YAKAP-accredited clinics.
Suno sa PhilHealth, lakip sa GAMOT List ang mga bulong para sa impeksyon, blood clot, hapo, malala nga balatian sa baga, diabetes, mataas nga kolesterol, hypertension, nervous system, kag iban pa.
Libre ang mga bulong nga yara sa GAMOT List, apang kun ang ginreseta nga bulong wala sa listahan ukon naglapaw sa P20,000 nga benepisyo, ang miyembro ukon pasyente ang sarang magabayad sang kinahanglanon nga kantidad.
Dugang pa, ang kada myembro ukon ang dependent, may yara sang P20,000 nga balor sang benepisyo sa bulong kada tuig.
Nahibaluan nga naglab-ot na sa masobra 1.720 milyon sang halos 8 milyon ka PhilHealth members kag dependents sa Western Visayas kag Negros Occidental ang naka-enroll sa Yaman ng Kalusugan Program (YAKAP).
Sa Iloilo City, 14 ka YAKAP clinics ang accredited sang PhilHealth para makahatag sang primary healthcare services sa mga myembro.
Ka-Bombo, ang kumpleto nga listahan sang mga YAKAP clinics sa syudad sang Iloilo nga accredited sang PhilHealth ang mahimo nga makit-an sa facebook page sang Bombo Radyo Iloilo.
