ILOILO CITY – Tanan nga nagahalit, nagasipa, kag nagagabot sang mga tanum sang syudad nga gina-develop sang City Beautification Program ang ginakabig ‘may deperensya sa ulo’.
Ini ang pahayag ni Iloilo City Mayor Jerry Treñas matapos may yara na sang tatlo ka kaso sang pagpangguba sang tanum sa syudad, sa diin ang una nga nadakpan nga suspek ang ginapahayag may sakit sa paminsaron.
Sa interview sang Bombo Radyo kay Treñas, iya ginpahayag nga nagakadapat lang nga dakpon ang tanan nga nagapanghalit kag sa tion nga himuon naman nga rason ang sakit sa paminsaron, dapat nila ini pamatud-an sa korte.
Suno kay Treñas, indi na bag-o ang ‘pagpabuang-buang’ apang kon matuod ang amo nga alegasyon, pwede man nga idiretso na lang ini sa ospital sa banwa sang Pototan.
Iya ginpahayag nga siya ang nasubuan kon ngaa may ara sang mga tawo nga nagamalibad sa pagkooperar sa pagpatahum sa syudad sang Iloilo, sa diin iya ini ginakabig nga ‘very unfortunate’.
Dugang ni Treñas, iya ginasigurado nga madakpan ang tanan nga responsable sa amo nga mga ‘ulugtasan’ nga akto.
