ILOILO CITY – Nagaginutok ang mga pasahero sa mga ticketing outlets sa Iloilo agud magproseso sang ila mga transaction partikular na ang pagpatemprano sang ila mga flights padulong sa Manila.
Ini matapos nga ginsuspinde ni Presidente Rodrigo Duterte ang domestic land, air kag sea travel padulong kag halin sa Metro Manila bangud sa kahangawa sa Coronavirus Disease 2019 (COVID-19) — epektibo Marso 15 tubtob Abril 14.
Sa interview sang Bombo Radyo kay Art Parreño, terminal supervisor sang Civil Aviation Authority of the Philippines (CAAP), iya ginpahayag nga bangud sa kadamo sang tawo, kulang naman ang mga personnel sang mga ticketing outlets nga mahimo makatatap sa hingyo sang mga pasahero.
Suno kay Parreño, madamo man ang personnel sang mga ticketing outlets ang may scheduled leave sa subong, apang bangud sa ginakabig ‘public demand’, nagpasalig naman ang tagsa ka pamunuan nga magabalik ang ila mga empleyado agud mag-augment sa trabaho.
Gin-athag man sang opisyal nga Iloilo-Manila kag vice-versa lang ang may problema sa subong, bangud mahimo pa man mabaton ang mga flights nga halin sa iban nga probinsya kag syudad sa Pilipinas.
Dugang pa ni Parreño, indi lang ang mga pasahero ang apektado sang virus kundi mangin ang mga empleyado man sa paluparan.
Pahayag sang opisyal, sila nga mga tinawo sa Iloilo International Airport ang nagakahangawa man sa ila seguridad, kag bangud kulang na ang suplay sang surgical mask, tela na lang kag tissue ang ila ginagamit kag gina-islan lang sa tagsa ka flight.
Naghingyo man si Parreño man sa mga empleyado kag sa publiko nga magpabilin nga kalmado kag ‘considerate’ sa tunga sang ginakabig global pandemic.
