ILOILO CITY – Tinguhaan sang 46 ka mga punong barangay sa syudad sang Iloilo nga mabawi ang ‘failed’ nga rating nga naangkon sa una nga hugnat sang assessment sang Department of the Interior and Local Government (DILG) sa road clearing operations.
Ini ang ginpasalig sang mga opisyal sa ginpatigayon nga pagsinapol nga ginpamunuan ni Iloilo City Mayor Jerry Treñas sang Martes, Marso 2.
Sa interview sang Bombo Radyo kay Treñas, iya ginpahayag nga indi na siya magduha-duha sa pagpasaka sang kaso-administratibo sa amo nga mga punong barangay sa tion nga may rekomendasyon nga ihatag ang DILG.
Nagapati si Treñas nga may bastante nga tion ang mga opisyal nga makabawi tubtob sa Abril 30, ang deadline sang 75-day period nga gintalana sang DILG.
Suno sa natungdan, ginpalab-ot man sang mga punong barangay ang ila mga problema sa road clearing operations ukon Oplan Hawan kag kalabanan sa ila ang nagareklamo sang illegal kag on-road parking.
Madamo man suno kay Treñas ang wala pa nakadihon sang ordinansa may kaangtanan sa amo nga paglapas.
Sa subong, wala pa nahatag sang Iloilo City Government ang opisyal nga lista sang 46 ka mga barangay nga may ‘failed‘ nga rating.
Apang, santu sa impormasyon sang Bombo Radyo, yari ang 41 (out of 46) nga nalakip sa amo nga mga barangay:
Sa Iloilo City Proper: Baybay Tanza, Danao, Ed Ganzon, Gloria, Jalandoni-Wilson, Kahirupan, Kauswagan, Liberation, Magsaysay, Malipayon Delgado, Maria Clara, Monica Blumentrit, Ortiz, Santo Rosario Duran, Tanza Timawa 1, kag Zamora Melliza;
Sa distrito sang Arevalo: Calaparan, Quezon, Sto Domingo, Sto Niño Norte, kag Yulo Drive;
Sa distrito sang Jaro: Balabago, Bito-on, Camalig, Calubihan, Dungon A., Lanit, Luna, Montinola, Our Lady of Lourdes, kag San Isidro;
Sa distrito sang La Paz: San Isidro kag San Nicolas;
Sa distrito sang Mandurriao: Q. Abeto, Calajunan, Hibao-an Norte, Oñate De Leon, kag PHCC Block 22 NHA;
Sa distrito sang Molo: Calumpang, East Baluarte, kag Tap-oc;
Samtang, yari naman ang lista sang mga high-compliant nga barangay:
Sa Iloilo City Proper: Veterans Village;
Sa distrito sang Jaro: Lopez Jaena kag Quintin Salas;
Sa distrito sang Lapuz: Aguinaldo;
Sa distrito sang Mandurriao: Bakhaw; kag,
Sa distrito sang Molo: South San Jose.
