May ara na sang kaugalingon nga kasilyas ang mga residente sa 103 ka mga barangay sa probinsya sang Iloilo.
Ini ang ginkumpirmar ni Dr. Maria Socorro Quiñon, head sang Iloilo Provincial Health Office.
Sa interview sang Bombo Radyo Iloilo kay Quiñon, iya ginpahayag nga nagatinguha gid sila nga tanan nga households sa probinsya ang makaangkon sang kaugalingon nila nga kasilyas.
Suno sa iya, importante nga sundon ang basic sanitation bangud dako ini nga bulig sa pagpugong sang nagkalain-lain nga masakit.
Pahayag pa ni Quiñon, ginapauswag pa gid nila ang pagpatuman sini sa mga banwa, ilabi na bangud makita gid ang positibo nga epekto sang husto nga sanitation.
Nahibaluan nga ang Tubungan pa lamang ang banwa sa probinsya sang Iloilo nga nakakuha sang G2 Basic Sanitation Status.
Naobserbahan man nga naganubo ang kaso sang water-borne diseases sa mga lugar nga nagatuman sini, samtang may nakita man nga pagnubo sa mga kaso sang dengue.
Target naman sang Iloilo Provincial Government nga mangin G2 certified ang bug-os nga probinsya sang Iloilo sa tuig 2028.
