Gin-abi-abi sang Metro Iloilo Water District (MIWD) kag sang Metro Pacific Iloilo Water (MPIW) ang proposal sang Aboitiz Group sang bulk water supply sa Iloilo City.
Sa interview sang Bombo Radyo kay Alfredo Tayo III, General Manager sang Metro Iloilo Water District, iya ginpahayag nga manami nga may dugang nga player nga mahimo mangin supplier sang tubig sa syudad sang Iloilo.
Suno kay Tayo, ang importante diri amo ang mahatagan sang kaayohan ang syudad sa patag sang tubig.
Ginpahayag man sini nga welcome ang tanan nga ‘players’ nga mahimo magtanyag sang ila tinutuyo sa bulk water supply.
Ginalantaw man sang natungdan nga mahimo lantawon sang Aboitiz Group ang timeline sang ila nga operasyon.
Dugang sini nga kinahanglan nga i-revisit sang nasambit nga water supplier ang ila pricing sang tubig bangud labing-importante gid ang hinun-anon sang mga consumers.
Nahibaluan nga nagtanyag sang nasambit nga kompanya sang P37 to P41 per cubic meter sang bulk water para sa syudad.
Ginlaragway naman sang Committee on Public Private Partnership sang Iloilo City Government nga matalunsay ang nangin presentasyon sang tagsa ka bulk water supplier.
Ini kasunod man sang ginpatigayon nga Public and Stakeholder Consultation.
Suno kay Atty. Dave Garcia, vice chairman sang Committee on Public Private Partnership, iya ginpahayag nga madamo sang mga concern ilabi na ang mga palamangkutanon nga ginbato sa ila.
Dugang sini, duha tubtob tatlo ka mga tawo ang nagpalab-ot sa ila nga kalabanan sa problema sa mga water supplier amo ang ila linya sang tubig.
Paathag sini nga may concern nga nagapatumod nga indi problema ang balor sang tubig, kundi ang water distribution lines.
May yara man nagsiling nga anhon ang bastante nga water supply kon indi man makalab-ot sa ila tagsa ka puluy-an.
Sa piyak sini, nagpasalig sa gihapon ang mga proponent nga sa sulod sang tatlo tubtob apat ka adlaw, mahimo makaayo ang mga distribution line nga maguba.
