Gin-athag sang hepe sang Molo Police Station nga indi detainee ang lalaki nga gin-alegar nga nakapalagyo kundi isa ka lalaki nga nagasuprir sang withdrawal syndrome bilang epekto sang paggamit sang illegal nga druga.
Sa interview sang Bombo Radyo kay Police Capt. Ryan Christ Inot, iya ginpahayag nga ginbilin sang asawa ang amo nga 32- anyos nga bana sa police station bangud nagawaras ini.
Suno kay Inot, nagpangita sang doktor ang asawa para ipaidalom sa rehabilitasyon ang iya bana apang nagpauli ini sa ila balay sa Katilingban, Molo rason nga napuhag ang mga pumuluyo.
Ginpahayag sang hepe nga indi man ma-detain ang lalaki bangud wala man ini ginpasakaan sang kaso.
Gilayon man nga ginpangita sang kapulisan ang lalaki.
Nahibaluan nga napreso sang 2016 paagi sa buy bust operation ang nasambit nga indibidwal kag sang nakagwa sang 2017, didto na nagpakita ini sang mga sintomas sang drug withdrawal syndrome kun sa diin naglain na ang batasan kag pagginawi sini.
