ILOILO CITY – Ginpanindugan sang Molo PNP nga lehitimo ang ila ginpatigayon nga buy bust operation sa Brgy. Cochero sa distrito sang Molo kun sa diin nadakpan si Paul Adrian Rubin, 31.
Sa interview sang Bombo Radyo kay Police Major Engelbert Banquillo, hepe sang Molo Police Station, iya ginpahayag nga alegasyon lamang sang arestado nga gin-abduct siya sa Brgy. Bolilao sa distrito sang Mandurriao antes gin buy-bust.
Suno kay Banquillo, kun may yara sang abduction nga natabo, kun tani ang Mandurriao PNP na ang nagpatigayon sang follow-up.
Ginpahayag ni Banquillo nga wala sang kontrobersiya nga natabo sa ginpatigayon nga buy bust operation kun sa diin lakip sa recoveries amo ang isa ka bulto sang suspected shabu kag P8,200 nga buybust money.
Suno naman kay Barangay Kagawad Teresa Mabunay sang Katilingban sa distrito sang Molo, siya ang nagpirma sa inventory sang recoveries.
Ginpahayag ni Mabunay nga pasado 12:00 sang kaagahon sang Marso 10 sang nabaton niya ang report nga may yara sang buy bust operation nga natabo.
Sa iya pag-abot sa area, ginpahayag ni Mabunay nga nakita niya nga yara sa sulod sang grey nga awto si Rubin antes ginpaguwa kag ginpapungko sa pulungku-an.
Sang iya nakita nga nagasanto man ang recoveries sa nakasulat sa inventory, gilayon niya ini nga ginpirmahan kag nagpauli sa ila balay.
