Opisyal na nga gintawag nga ‘Filipinas’ ang Philippine Women’s National Team samtang gin-umpisahan naman sini ang ila preparasyon para sa 2023 Fifa Women’s World Cup.
Gindula na ang moniker sang team nga ‘Malditas’ nga madugay man nga ginbaisan bangud sa negatibo sini nga kahulugan.
Suno sa team manager nga si Jefferson Cheng, mas simple kag mas nationalistic ini nga moniker kag naga-tiglawas kun ano ang team.
Bilang kabahin sang pagpanghanda para sa 31st Southeast Asian Games sa Vietnam, nag-set up ang Filipinas sang training camp sa Sydney, Australia.
Natalana sini nga kontrahon ang Fiji sa Abril 7 kag Abril 11.
Sunod nga magapadulong ang team sa Vietnam sa temprano nga bahin sang Mayo para sa SEA Games.
May duha pa ini ka major meets subong nga tuig — ang ASEAN Football Federation (AFF) Women’s Championship sa Hulyo kag ang Asian Games sa China sa Septyembre.
