ILOILO – Ginpirmahan na sang Iloilo Provincial Government, Department of Energy, kag United Nations Development Program ang memorandum of understanding ukon MOU para sa Development of Renewable Energy Applications Mainstreaming and Market Sustainability ukon DREAMS project.
Ang DREAMS project ang natalana nga ipatuman sa Ajuy, Carles kag Concepcion agud panubuon ang greenhouse gas emissions gikan sa power sector.
Ini ang patigayunon paagi sa pag-promote kag paggamit sang renewable energy kag pagduso sang local government units sang energy planning.
Nangin kabahin sang amo nga pagpirmahanay sanday DOE Undersecretary kag DREAMS Project Chairperson Felix William Fuentebella, UNDP Climate Action Project Team leader Ms. Floradema Eleazar, Board Member Rolando Distura, Board Member Ramon Sullano, kag Provincial Administrator Atty. Suzette Mamon.
Sa interview sang Bombo Radyo kay Concepcion Mayor Raul Banias, iya ginpahayag nga nagakaangay gid ang DREAMS project sa banwa sang Concepcion bangud may 16 ini ka isla kag ginabanta kapin 50 porsyento sa mga tawo ang nagapuyo sa sini nga mga isla.
Kalabanan sa mga pumuluyo suno kay Banias ang nagagamit sang suga nga kingke, petromax, kerosene lantern, ukon solar.
Bangud sa DREAMS project, ginalauman suno sa opisyal nga mahatagan na sang solusyon ang madugay na nga problema sang mga residente.
Dugang pa sang natungdan, antes pa man ang nasambit nga proyekto, may partnership na ang local government unit sang Concepcion sa Palm Concepcion Power Corporation ukon PCPC sa diin nag-donate ini sang balor P8 million nga solar street light agud ma-install ang 244 ka mga lamp posts.
Magluwas diri, suno kay Banias, nakigsapol siya sa isa ka solar company nga natalana man nga maga-install sang 85 kilowatt power capacity sa banwa nga amo ang maga-supply sang kuryente sa municipal hall, health office, legislative office, kag police station.
