ILOILO CITY – Ginlaslasan ni Msgr. Meliton Oso, director sang Jaro Archdiocesan Social Action Center, sa iya homily ang kontraktor nga International Builders Corporation kag opisyal sang Department of Public Works ang Highways nga naangot sa pagtukod sang kontrobersyal nga P680-Million Ungka Flyover.
Suno kay Msgr. Oso, kinahanglan nga manabat ang mga tawo sa likod sang depektibo nga flyover nga nagtuga sang perwisyo sa mga Ilonggos.
Ginpahayag dugang sang natungdan nga daw sa ginpabungol-bungolan lang sang mga ini ang katungdanan nila sa publiko.
Bangud sa natuga nga perwisyo, plano ni Msgr. Oso nga magpasaka sang kaso sa Office of the Ombudsan batok sa mga tawo nga responsable sa palpak nga flyover.
Indi naman kumporme si Oso nga gastuhan sang dugang nga P250-Million para sa rehabilitasyon sang proyekto.
Nagpanawagan naman si Oso sa mga Ilonggo nga kongresista nga mag-obra na sang tikang agud pasabton ang tanan nga naangot sa depektibo nga Ungka Flyover.
