“Wala sang kapatawaran kun wala sang restitution.”
Ini ang ginhatagan sang igtalupangod sa misa sang director sang Jaro Archdiocesan Social Action Center nga si Msgr. Meliton Oso alas syete kaina sang aga sa Jaro Metropolitan Cathedral.
Gindala ni Oso sa iya homily ang tatlo ka sahi sang sinsero nga paghinulsol sa sala nga amo ang: una, malig-on nga desisyon nga untatan ang makasasala nga buluhaton kag batasan.
Ikaduha amo ang malig-on nga handum kag desisyon nga mangin masinulundon sa Ginuo kag likawan ang paglalis sa Iya kabubut-on.
Ang ikatatlo amo ang restitution nga amo ang panawagan sang simbahan sa mga kurap nga nagbulsa sang binilyon ka pesos nga para kuntani sa flood control projects.
Buot silingon sini, dapat nga ibalik kun ano ang ginkawat halin sa pondo sang gobyerno.
“Wala sila siguro diri, pero basi may kilala kamo, hambala ninyo nga gin-sermon ni Msgr. Oso nga budlayan ka makapalangit kun indi ka mag-repent kag mag-restitute,” suno kay Oso.
Ginbalikan sini ang ginhimo nga anti-corruption protests sang nagligad nga Septyembre 21. Ini nga mobilisasyon ang patigayunon pa gid liwat sa Nobyembre 30.
“We want you to realize that stealing public money is a very great sin and that is stealing from the poor. STEALING FROM THE POOR,” pahayag sang JASAC Director.
ANG TATLO KA SAHI SANG KAWATAN
Ginpatpat man ni Oso kun ano ang tatlo ka sahi sang kawatan nga nagapakuno-kuno lang sa pagbulig sa iban nga tawo agud tabunan kun ano ang ila kinawatan.
Ang una amo amo ang Good Samari-THIEF nga makawat kag kurap, apang palasimba.
Ang ikaduha amo ang Holy Chari-THIEF nga kawatan apang nagabulig sa mga imol.
Ang ikatatlo amo ang Philanthro-THIEF nga kawatan apang nagpahimo sang simbahan kag kapilya.
Gin-mensyonar pa ni Oso sanday Ako Bicol Representative Zaldy Co, Curlee Discaya, kag iban pa nga amo ang major donors sang Nuestra Señora de Salvacion Church sa Bachawan, San Agustin, Romblon nga ginkilala bilang Parokya sang Pebrero 2024.
Si Co ang na-implicate sa flood control corruption samtang si Discaya ang isa naman ka kontraktor nga sentro man sang imbestigasyon bangud sa kurapsyon.
Nagpaandam si Oso sa mga kurap nga bisan magbulig pa sa iban, magsimba, ukon magdonar sang simbahan, wala man gihapon sang kapatawaran kun wala sang restitution ukon kun wala ginabalik ang kinawatan.
“Loudly, therefore, we call on you, REPENT AND RESTITUTE. REPENT AND RESTITUTE! Indi kita makapalangit kun indi kita maghinulsol kag mag-restitute,” pahayag pa ni Oso sa iya nga homily.
