Ginkoronahan bilang Miss Iloilo 2024 ang 22-anyos nga Filipino-American model, athlete, kag beauty queen nga si Alexie Mae Caimoso Brooks nga tumandok sang banwa sang Leon.
Ginlutos ni Alexie ang 14 ka iban pa nga mga kandidata nagikan sa nagkalain-lain nga mga banwa sa pageant nga ginpatigayon sa West Visayas State University Cultural Center, Enero 13, kag amo ang gintugyunan sang korona ni Miss Iloilo 2023 Raniele Shaine S. Saulog.
Nanghakot man ini sang awards sa event lakip na ang Best in Swimsuit Award kag siyam ka special awards halin sa corporate sponsors.
Ginhatag man sini kag ginpasuksok sa iya Lola Basing ang tanan niya nga sash samtang nagapanugid nga amo ini ang nagpadaku sa iya kag nagtudlo sa pagpangabuhi.
Antes pa man ang koronasyon sa Miss Iloilo, kilala si Brooks nga atleta sa Western Visayas ilabi na sa heptathlon kag high jump.
Nanghakot ini anay sang gold medals kag nakahimo sang record-breaking feats sa Western Visayas Regional Athletic Association Meet, Palarong Pambansa, University Athletic Association of the Philippines, kag Philippine Athletics Championships kag nakapasakop man sa Vietnam SEA Games sang 2022.
Suno pa sa natungdan, 2019 siya sang nagdaog man sa Miss Iloilo National High School, apang pagkasunod nga tinuig, nagtutok na ini sa academics, sports, kag modeling kag subong lamang siya nagbalik sa pageant stage.
HEARTFELT QUEENS & RUNNERS-UP
Sa Miss Iloilo 2024 pageant, ginhingadlan man nga first-runner up ang 21-anyos nga si Pearl Angel R. Franco sang Ajuy, Iloilo.
Second runner-up naman ang 26-anyos nga broadcasting graduate nga si Shaima Al Yansuri sang Guimbal nga amo man ang nagdaog sang Best Advocacy and Tourism Video.
Automatic naman nga gin-deklarar nga Heatfelt Queens ang iban pa nga mga kandidata sa Top 7 nga amo sanday Angel Jed Z. Latorre, 18, sang Santa Barbara nga amo ang nagdaog sang Best In Gown; Hamda A. Judicpa, 17, sang San Miguel; Nicklyn T. Jutay, 21, sang Tigbauan; kag Raniella Louise A. Aguila, 21, sang Cabatuan.
Ang Miss Iloilo 2024 amo ang isa sa highlights sang Dinagyang Festival 2024 nga may tema “Pagdayaw kay Señor Sto. Niño, Padayaw sang mga Ilonggo.”#
(Featured Photos: Alexie Brooks/FB)
