LAMBUNAO, ILOILO – Wala sang patigayunon nga contact tracing sa isa ka Locally Stranded Individual nga nagpositibo sa Coronavirus Disease 2019 (COVID-19) bangud diretso ini nga ginpa-idalom sa quarantine facility kag wala na nakapauli pa sa Lambunao, Iloilo.
Sa interview sang Bombo Radyo kay Lambunao Mayor Reynor Gonzales, iya ginpahayag nga naghalin sa Cebu ang LSI kag pag-abot sini sa Iloilo, gilayon siya nga gindala sa isa ka pasilidad agud ipa-idalom sa 14 day quarantine.
Suno kay Gonzales, wala man siya nagakabalaka sa sitwasyon sang banwa bangud wala man nakapuli sa iya pamilya ang amo nga locally stranded individual.
Dugang pa sang alkalde, kun naghalin sa high risk area ang isa ka returning resident, ila gilayon nga ginadala ini sa facility quarantine samtang nagahulat sang resulta sang COVID-19 test.
Kun mag negatibo naman, mahimo na ini makapauli sa ila balay kag tapuson ang nabilin nga adlaw sa pag-quarantine.
