Pormal na nga nagtakop ang Palarong Pambansa 2026 nga gin-host sang Agusan del Sur.
Gindeklarar nga overall champion ang National Capital Region (NCR) nga may 91 gold, 71 silver, kag 71 bronze ukon may kabug-usan nga 233 medals.
Ini na ang ika-19 nga sunod-sunod nga kampyonato sang NCR sa Palarong Pambansa.
Ini naman ang ikatatlo nga sunod-sunod nga edisyon nga lapaw sa 90 ang gold medals sang amo nga rehiyon matapos nga nahimo man nila ini sa Cebu City nga may 98 kag sa Ilocos Norte nga may 117.
Ang most bemedaled athlete subong nga tuig ang naghalin man sa Metro Manila nga amo ang swimmer nga si Patricia Mae Santor nga na-sweep ang tanan nga gold medals sa pito ka events sa secondary girls’ division.
Nagpangaduha sa NCR ang CALABARZON nga may 55 gold samtang nagapangatlo ang Davao Region ang nagpangatlo nga may 34 gold medals.
Nataktak naman sa 5th place ang Western Visayas halin sa anay third place finish sadtong 2024 kag 2025. Subong nga tuig, may 31 gold, 36 silver, kag 45 bronze medals ang Rehiyon VI. Ini ang una nga edisyon sang Palaro nga indi na sini kaupod ang Negros Occidental nga yara na subong sa Negros Island Region.
Nagtapos ang Palaro kagab-i paagi sa presentasyon sang plaques of appreciation, may closing prayer, kag nag-isa ang tanan para sa grand unity dance finale nga may titulo “We Rise As One: The Ultimate Palaro Dream.”
Sa mensahe ni DepEd Sec. Sonny Angara, gindayaw sini ang Agusan del Sur sa pag-set sang bag-o nga standard sa pag-host sang Palarong Pambansa. Ginpasalamatan sini ang probinsya sa mataas nga lebel sang inobasyon, pag-ulikid sa mga atleta, kag paghatag sang world class nga mga pasilidad.
Maga-host sa 2027 edition ang Quezon City.
