Naghimo sang maragtas ang Parker Solar Probe sang National Aeronautics and Space Administration (NASA) paagi sa paglupad padulong sa outer atmosphere sang adlaw nga ginatawag nga corona sa isa ka mission nga buligan ang mga scientists nga mas matun-an ang pinakamalapit nga bituon sa kalibutan.
Suno kay Nick Pinkine, ang mission operations manager sa Johns Hopkins Applied Physics Laboratory, wala pa sang ano man nga human-made object nga nakalabay sang tuman ka lapit sa star.
Ang Parker ang magalupad sa 3.8 million miles (6.1 million km) halin sa surface sang adlaw subong nga Mierkules.
Sa Biyernes naman makumpirma sang mission operators ang resulta.
Agwantahon sang spacecraft ang tubtob sa 1,800 degrees Fahrenheit (982 degrees Celsius) nga temperatura.
Nahibaluan nga sang una naglabay sa solar atmosphere sang 2021 ang Probe, nakakita ini sang bag-o nga detalye sa boundaries sang atmosphere sang adlaw kag nagkolekta sang mga close-up images.
Humalin sang ginlunsar ang spacecraft sang 2018, nagalibot na ini palapit sa adlaw.
