Ginsabat sang National Bureau of Investigation (NBI) ang mga pahayag ni Senador Alan Peter Cayetano nga nagtawag kay NBI Director Melvin Matibag nga isa ka “cartoon character” kag “minion.”
Sa ginpagwa nga pahayag sang NBI kahapon nga adlaw, ginpahayag sang ahensya nga indi nila pag-personalon ang kaangay nga pagpabati-bati sang senador.
Dugang pa sang ahensya, padayon nga tumanon ni Director Matibag ang iya mandato sa publiko.
Nahibalaun nga antes sini, sa isa ka Facebook Live, gintawag ni Cayetano si Matibag nga isa ka “minion,” nga isa ka karakter sa pelikula nga Despicable Me.
Ginhambal ini sang senador matapos ipahayag ni Matibag nga imbestigaran sang NBI ang ginapahayag nga mga iregularidad sa pagtukod sang mga pasilidad nga ginamit sa 2019 SEA Games.
Suno kay Matibag, upod sa ila imbestigaran ang Philippine Southeast Asian Games Organizing Committee (PHISGOC), nga ginpangunahan sang una ni Cayetano, bangud sa ginapahayag nga wala ini na-audit apisar nakabaton sang kapin P2 bilyon nga pondo halin sa gobyerno.
Sa bahin naman ni Cayetano, ginpabutyag niya nga ginagamit ni Matibag ang imbestigasyon agud pahadlukon siya antes sang pagtestigo sang NBI director sa impeachment trial ni Vice President Sara Duterte sa Senado sa subong nga semana.
Ginpabutyag naman sang NBI nga ang ila imbestigasyon ginpatigayon agud masiguro ang husto nga paggamit sang pondo sang gobyerno.
Ginpasiguro man sang ahensya nga patas ang ila imbestigasyon, nakabase sa ebidensya, kag nagasunod sa mandato sang layi.
