Nag-isyu sang subpoena ang National Bureau of Investigation kanday Batangas First District Representative Leandro Leviste kag anay kongresista sang 1st District sang Negros Oriental nga si Jacinto “Jing” Paras.
Kabahin ini sang imbestigasyon sa gina-alegar nga “bugaw” scheme batok kay Executive Secretary Ralph Recto.
Base sa imbestigasyon sang NBI, ginapatihan nga nalakip sanday Leviste kag Paras sa pagplano ukon paghimo sang istorya agud madalahig si Recto sa mga alegasyon nga may kaangtanan sa human trafficking, prostitusyon kag paggamit sang iligal nga droga.
Nag-ugat ang imbestigasyon matapos ang pag-ako sang isa ka talent manager nga nadakpan sang NBI-NCR sa isa ka entrapment operation sa isa ka hotel sa Malate, Maynila.
Sa amo man nga operasyon, naluwas ang lima ka mga babayi nga artista.
Suno sa talent manager, ginhambalan siya ni Paras nga magpakigkita sa apat ka mga babayi agud engganyuhon ang mga ini nga maghatag sang indi matuod nga pahayag nga ginpilit sila ni Recto nga maggamit sang iligal nga droga kag makighilawas sa iya.
Kabaylo sini ang ginpromisa nga isa ka milyon ka pesos sa tagsa ka babayi, ukon kabug-usan nga lima ka milyon ka pesos para sa talent manager kag sa apat ka mga babayi.
Ginpahayag man sang talent manager nga si Leviste ang ginapatihan nga nagpondo sang amo nga plano batok kay Recto.
Suno kay NBI Director Melvin Matibag, nakuha nila ang isa ka cellphone halin sa isa sa mga nalakip sa kaso, kag didto nakita ang ginpanas nga mga mensahe kag komunikasyon nga nagakonektar kay Paras sa gina-alegar nga plano.
Ginlaragway naman sang NBI chief ang amo nga plano bilang isa ka character assassination, kag indi lamang si Recto ang target sini.
Ginapaabot man nga magpakigkita sanday Leviste kag Paras sa opisina sang NBI sa masunod nga semana agud maghatag sang ila nga sabat.
Lunsay naman ginpanginwala nanday Leviste kag Paras ang tanan nga alegasyon nga ginahaboy batok sa ila.
