Lunsay nagpasalig ang National Commission for Culture and the Arts (NCCA) kag ang National Historical Commission of the Philippines (NHCP) nga magabulig sa pag-restore sang Manila Central Post Office matapos nga nasunog.
Suno sa state culture agency, ang nasambit nga masobra 100-ka tuig nga maragtason nga building ang ginakilala nga Important Cultural Property (IMP) kag isa sa pinakadumaan, pinakamatahum, kag pinaka-iconic nga estruktura sa Manila.
Ginpasigurado man sini nga makabalik sa normal nga operasyon ang Philippine Postal Corporation.
Ang NHCP naman ang nagpasalig nga maga-trabaho ini kaupod sa local kag national agencies para sa rehabilitasyon sang building.
Una na nga ginpahayag sang Bureau of Fire Protection (BFP) nga nag-umpisa ang sunog sang Domingo sang tungang gab-i sa basement kag masobra 80 ka firetrucks ang nag-responde apang naglawig sang masobra walo ka oras ang sunog antes ini na-deklarar nga under control sang Lunes sang aga.
Sa inisyal nga estimate, yara sa P300 million ang balor sang kahalitan kun sa diin apektado ang mga sulat nga ipadala sa mga probinsya kag sa luwas sang pungsod, kag pati man ang National Identification Cards.
Nagpanawagan naman si Sen. Robinhood Padilla sang imbestigasyon sa Senado kasunod sang amo nga sunog agud mabisitahan man kag ma-assess kun ano ka-epektibo ang preservation kag protection measures sa Pilipinas. #
