Nagguwa sa inisyal nga imbestigasyon nga nagpaidalom sa “Islamist radical indoctrination” ang lalaki nga nagbuno sa kaupod sini nga piloto kag nagtinguha nga maagaw kag makontrol ang flight halin sa Dubai tubtub sa Tel Aviv.
Ini ang santo sa gin-anunsyo ni Israeli Prime Minister Benjamin Netanyahu.
Suno sa Israeli official, posible man nga ginplano sang suspek nga ipatibusok ang eroplano apang ginklaro niya nga wala pa siya nagahatag sang pinal nga konklusyon kaangot sa motibo sang pag-atake.
Matandaan nga ang eroplano sang Flydubai ang nagsarurot sang 17,000 ka tapak ukon 5,200 metros antes nga napunggan sang mga pasahero kag crew ang suspek kag nakahugpa ang eroplano nga luwas ang tanan sa katalagman.
Antes sini, ginbuno pa sang suspek ang co-pilot nga si Smit Machchhar halin sa India kag ginapahayag nga nagtinguha nga ma-sabotahe ang system sang aircraft.
Suno naman sa UAE state news agency, gin-umpisahan na ang imbestigasyon agod matukiban kon may kaangtanan ang insidente sa bisan ano nga aktibidad ukon katuyuan nga terorista.
Ginpatigayon ang emergency landing sa Saudi Arabia, kag suno sa Interior Ministry sang amo nga pungsod, gindul-ong na pauli sa UAE ang piloto kag co-pilot sang Huwebes matapos ma-clear sang mga medical team.
Ginpahayag man sang Netanyahu nga ang suspek, nga iya gin-identify bilang isa ka Omani national, nagsinggit sang “kill me” matapos siya mapunggan kag gapuson sang mga pasahero kag crew, nga ginakabig niya nga indikasyon sang suicidal behavior.
Ginkilala naman sang Israeli Prime Minister si Machchhar bilang baganihan bangud sa pagbato apisar sang iya pilas —bagay nga nakapugong sang ginapanan-aw nga isa naman ka “9/11 disaster.”#
