GUIMARAS – Nagalaum si Vice Gov. John Edward Gando nga mapasar na sa masunod nga regular session ang ginaduso nga ordinansa may kaangtanan sa new normal sa bug-os nga probinsya sang Guimaras.
Ang ‘New Normal Ordinance’ ukon An Ordinance Prescribing For Measures and Policies Against Emerging and Re-emerging Infectious Diseases in the Province thereby Establishing the ‘New Normal’ in Connection therewith’ ang ginduso mismo sang Bise Gobernador kaupod ang duha ka board members nga sanday Josefina De La Cruz kag Cyril Celtran.
Sa pagpaathag ni Gando nga isa man ka abogado, katuyu-an sang pahduso sang nasambit nga ordinansa amo ang pagtib-ong sang health and safety sa tanan nga Guimarasnon lakip na sang mga dumuluong nga nagapadulong sa isla.
Magluwas diri, nakasaad man sa proposed ordinance ang pagpatuman sang screening protocol para sa mas mahapos nga contact tracing lakip na diri ang pagpatuman sang minimum health standards kasubong sang pagsuksok sang face mask, pagsunod sa physical distancing, pag-angkon sang health declaration card, inbound kag outbond pass sa tion nga magbyahe paguwa kag pasulod sa isla.
May kaangtanan diri, gin-amyendaran man ang existing ordinance tuhoy sa silot nga igahatag sa mga magalapas sa minimum health strandards kun sa diin P500 sa 1st offense, P1,000 sa 2nd offense kag P1,500 sa 3rd offense.
Sa ginaduso nga ordinansa, pagahatagan na sang citation ticket ang violator kag kinahanglan nga mag-report sa Provincial Legal Office sa sulod sang 72 ka oras para sa settlement.
Kun mapaslawan ang violator suno sa natungdan, nagakahulugan lamang ini nga nakahanda siya nga pasakaan sang nagakaigo nga kaso paagi sa direct filing bangud sa paglapas sa protocol.
Magapaguwa sang subpoena ang korte kag kun magsunod ang violator, diri na patigayunon ang arraignment apang sa tion nga mapaslawan ang violator nga mag-atubang sa korte sa gintalana nga petsa, diri na kag ipaguwa ang warrant of arrest.
