ILOILO CITY – May yara sang nagkalain-lain nga pamaagi ang mga establisyemento sa syudad sang Iloilo agud maprotektahan ang ila mga staffs kag costumer batok sa Coronavirus Disease 2019.
Una na diri ang mga pharmacy sa syudad nga nagbutang sang mga plastic sa kada counter agud malikawan ang physical contact sa tunga sang mga pharmacist kag costumer.
Ini bangud man hugot nga ginapatuman ang social distancing agud malikawan nga matapikan sang nasambit nga balatian ang mga pumuluyo.
Nagasuksok naman sang mask kag gloves ang mga staffs sang isa ka super market sa syudad agud malikawan nga maka close contact ang mga costumer.
Hugot naman nga ginapatuman ang ‘No mask, No entry’ sa pila ka mga establisyemento sa syudad.
Samtang, sa ginpatigayon nga press conference sang Department of Healthi ginpahayag ni Dr. Marlyn Convocar direktor sang Department of Health 6 nga wala nadala sa ila protocol ang pagpatuman sang ‘No mask, No entry’ sa mga establisyemento.
Suno sa kay Convocar base sa ila protocol ang mga health workers kag may balatian lang ang nagakadapat nga magsuksok sang face masks.
Kun luyag nga magreklamo sang mga pumuluyo, mahimo nga ipalab-ot nila sa ila Local Government Unit ukon direkta sa Department of Trade and Industry.
