ILOILO CITY- Tuman ka nubo ang numero sang mga households sa Iloilo nga may access sa safely managed nga potable water ukon matinlo nga tubig nga sarang mainom.
Sa interview sang Bombo Radyo kay Dr. Raul Banias, Provincial Administrator, iya ginpahayag nga base sa data sang Provincial Health Office, sa masobra 500,000 households, yara lang sa 37% ukon kapin 180,000 households lang ang may access sa matinlo nga tubig.
Suno kay Banias, ini ang rason kun ngaa masako ini kaupod ang iban nga mga ahensya sa pagpangita sang mga solusyon sa sini nga problema.
Pahayag ni Banias, kahapon nagpatigayon sila sang pagsinapol kaupod ang iban nga talatapan agud maghimo sang rekomendasyon nga ila ipresentar kay Governor Arthur Defensor Jr.
Suno pa sa iya, sa masunod nga bulan, may hiwaton nga Water Summit nga tambungan sang mga stakeholders agud nga magiyahan sang mga eksperto sa kun paano masolusyunan ang kakulangan sa matinlo nga tubig.
