Pormal nga naghingyo ang National Youth Commission (NYC) kay President “Bongbong” Marcos Jr. nga mag-isyu sang executive order nga magahimo sa Reserved Officers Training Corps (ROTC) program nga mandatory sa college students.
Naghingyo man si NYC chairperson Ronald Cardema sa presidente nga i-require ang Citizens Army Training (CAT) sa high school kag ang Boy Scouts/Girl Scouts program sa elementary students.
Sa iya sulat sa Malacañang, ginpahayag ni Cardema nga sang panahon ni former President Ferdinand Marcos Sr., prayoridad ang ROTC, CAT, kag scouting nga amo suno sa iya ang naghatag sang “sense of nationalism, discipline, and preparedness” sa mga Pilipino kag amo ang madasig nga makabulig sa pungsod kun kinahanglanon.
Una na nagpahayag si Vice President and Education Secretary Sara Duterte-Carpio nga nagalaum siya nga madala ang mandatory ROTC sa priority legislative agenda sang administrasyon.
Sang campaign period, matandaan nga nagpahayag man si Duterte-Carpio nga iduso niya ang mandatory military service sa Filipinos edad 18 anyos kun magdaog siya bilang vice president.
Kun balikan, gin-untat ang mandatory ROTC program sang 2002 kasunod sang pagpasa sang Republic Act 9163, ang layi nga nag-establisar sang National Service Training Program (NSTP).
Ginhimo ini nga layi kasunod sang natabo sang Marso 2002 kun sa diin ginpatay ang estudyante sang University of Santo Tomas nga si Mark Wilson Chua. Ginpahayag nga ang ROTC handlers ang nagpatay sa biktima kasunod sang iya pagbuyagyag sang corruption sa training program.
HALIMBAWA SANG IBAN NGA MGA PUNGSOD
Sa sulat naman ni Cardema, ginpahayag sini nga ang National Service Program sang Singapore ang naghatag sang “discipline and professionalism” sa mga kabataan kag nagbulig sa ila nga mangin first world country.
Sa South Korea suno kay Cardema, tanan nga mga lalaki lakip na ang movie stars kag anak sang tycoons ang required nga magserbisyo sa front lines sa sulod sang duha ka tuig nga amo ang nagahatag sang “sense of pride and military preparedness.”
Ginpahayag man sini nga na-untat sang Israel ang invasions sang kaiping nga mga pungsod bangud man sang mandatory military training nga ginhatag sa mga kabataan.
“The population of the Philippines is far bigger than that of Singapore, Israel, and South Korea. We are a disaster-prone archipelago that is battered annually by typhoons, floods, earthquakes, other disasters, and a communist insurgency. With that, we need to start orienting/training the millions of Filipino youth towards disaster preparedness, good citizenship, national defense and to have a strong nationalism starting now,” kabahin sang pahayag ni Cardema. ##
(Reserve Officers Training Corps – ROTC FB page)
