ILOILO CITY – Gina-agda sang Philippine Statistics Authority ang tanan nga mga ahensya sang gobyerno, local government units, academic institutions, state universities and colleges kag private sector sa national kag subnational levels nga magpasakop kag suportahan ang 31st National Statistics Month celebration subong nga October 2020.
Sa interview sang Bombo Radyo kay Roel Jude Bagaforo, Statistical Analyst sang Philippine Statistics Authority Region 6, iya ginpahayag nga santo sa Presidential Proclamation No. 647 nga ginpirmahan ni anay Presidente Corazon Aquino, ang kada bulan sang Oktubre ang gintalana sa pagsaulog sang National Statistics Month.
Lakip sa katuyuan sang National Statistics Month amo ang pag-promote, pag-enhance kag paghatag sag awareness kag appreciation sa importansya sang statistics sa nagkalain-lain nga sektor sang komunidad kag pagsuporta sa publiko sa pagpatin-ad sang kalidad kag standard sang statistics sa pungsod.
Tema subong nga tuig sang selebrasyon amo ang “Bridging Digital Gaps: Making Information Available To All.”
May patigayunon man nga mga webinars ang ahensya subong nga tuig kag wala sang mga pampubliko nga pagtililipon.
Samtang sa mga mga luyag maglantaw sang mga statistical data, mahimo man mag search sa www. openstat.psa.gov.ph sa diin diri makit-an ang demographic ans social statistics, economic statistics kag environment and multi-domain statistics.
Sa subong nga pandemya, dako man ang papel sang Philippine Statistics Authority sa diin sila sang nagabulig sa national inter-agency committee.
