Ginmanduan sang Office of the Ombudsman ang mga awtoridad sa Benguet nga himuson ang cellphone kag tanan nga gadgets ni resigned public works undersecretary Catalina Cabral matapos nasapwan ang lawas sini malapit sa Bued River sa Kennon Road sa Tuba, Benguet.
“The Ombudsman’s office directs the authorities in Benguet to take custody of and preserve the cellphone and other gadgets of former Usec. Cathy Cabral,” suno kay Assistant Ombudsman Mico Clavano.
Ginsugo man sang opisina nga dapat i-turn over ang gadgets sa mga imbestigador sa husto nga tion.
Nagdugang pa sang mensahe si Clavano: “We need her phone at ALL COST!”
Sandig sa Benguet Police, nakit-an sang mga personnel sang Baguio City Police Office si Cabral malapit sa Bued River. Ginakabig pa lamang ini subong bilang insidente sang pagkahulog, kag wala pa sang kumpirmasyon kun may yara sang foul play.
Base sa pagpangusisa sang pulis, alas tres kahapon sang hapon, nagabyahe si Cabral kag ang iya driver sa Kennon Road padulong sa La Union, apang nag-request si Cabral nga magdulog sa Maramal, Camp 5, Camp 4, kag naghingyo nga magpabilin ini anay didto.
Nagbalik ang driver sa area sang alas singko sang hapon, apang wala na si Cabral.
Sang alas syete na sang gab-i, nagpangayo na sang bulig ang driver sa pulis bangud wala gihapon nakit-an ang anay undersecretary.
Sang nag-responde na ang mga pulis, nakit-an ang biktima sa kilid sang Bued River. Ginabanta nga 20 tubtub 30 ang kataason sang pil-as kun sa diin siya ginaalegar nga nahulog. Sang amo nga tion, wala na sang pangalibutan ang anay opisyal. 12:03 kaina sang kaagahon, gindeklarar siya nga patay.
Matandaan nga nag-resign si Cabral sang Septyembre sa tunga sang imbestigasyon sa mga anomaliya sa flood control projects nga naangot sa ginaalegar kickbacks sang mga mamalidha kag mga opisyal sang gobyerno.
Lakip man siya sa gin-implicate ni former DPWH Undersecretary Roberto Bernardo nga may kahilabtanan sa kurapsyon.
Sang nagligad nga Lunes, may hearing ang Independent Commission for Infrastructure (ICI) kag isa si Cabral sa gin-imbitar nga resource persons, apang wala siya nagkadto.#
