Ginbawi sang anay suldado kag anay security aide ni Zaldy Co nga si Orly Guteza ang una sini nga pahayag nga nagdul-ong ini sang minaleta nga kwarta kay anay House Speaker Ferdinand Martin Romualdez.
Sa bag-o sini nga affidavit, ginpahayag ni Guteza nga sanday Sen. Rodante Marcoleta kag anay kongresista nga si Mike Defensor ang nagpilit sa iya nga maghimo sang mga akusasyon batok sa former House Speaker.
May kabaylo man ini suno sa iya kun sa diin ginpangakuan ini sang kwarta kag scholarship para sa iya nga mga bata.
Suno kay Guteza, gindala siya sa isa ka Japanese restaurant malapit sa Senado kun sa diin nakahanda na ang draft sang affidavit.
Pahayag pa sini nga ginkay-o ni Marcoleta ang dokumento nga naka-Tagalog na ini nga ginapahayag ginhimo sang isa ka nakapangalan nga “Mark,” nga ginapatihan nga umagad ni Defensor.
Gin-insister man ni Guteza nga antes sang iya hearing sa Senate Blue Ribbon Committee sang Setyembre 2025, ginhambalan siya ni Marcoleta nga indi magtalang sa unod sang affidavit.
Dugang pa ni Guteza nga sang nag-ad-lib ini sa iya testimonya, ginakastigo ini.
Ulihi na sini narealisar nga gin-gamit lamang siya.
Suno pa sa iya, nagpangako si Defensor sang kwarta kag scholarship para sa iya mga kabataan, rason nga nagpasugot ini nga himuon ang ginapahimo sa iya.
Sa subong, wala pa nakahatag sang ila sabat sanday Marcoleta kag Defensor.
Suno naman sa Ombudsman nga ginahulat pa sini ang bag-o nga affidavit ni Guteza antes magpagwa sang pahayag.
Nahibaluan nga si Guteza isa man sa pila ka anay security aide ni Zaldy Co nga nagbawi sang ila mga testimonya nga nagdalahig kay Romualdez kag iban pa nga mga personalidad sa gina-alegar nga anomalya sa mga proyekto sa flood control.
