ILOILO CITY- Kun mabatian mo ang pangalan nga OSAMA BIN LADEN, pat- ud nga una nga magasulod sa imo pinsar nga siya ang pinaka-notoryus nga terorista sa kalibutan.
Siya ang ginakahadlukan kag ginakaugtan bangud sa iya malain nga mga hinimuan sang una. antes siya napatay sang 2011.
Apang, nakahibalo ka bala nga buhi siya kag nagahampang pa sang professional football?
Buhi… ang iya pangalan apang lain na nga tawo ang nagapanag-iya sini.
Siya amo ang 22-anyos nga si Osama Vin Laden, nga isa ka football player halin sa Peru.
Sikat siya indi lang bangud sa iya abilidad kundi bangud siempre sa iya pangalan.
Una nga nagtaas ang kilay sang mga tawo sang nabatian nila si Osama Vinladen Jimenez Lopez sang 2017, sang ginlawag siya bilang kabahin sang South American country’s U-15 (Under 15) team.
Naghimo siya sang iya debut para sa professional football club sang 2018, sang nangin kabahin siya sang club nga Union Comercio.
Sa pihak sang indi manami nga reputasyon sang iya kapangalan, wala man ini ginakabig nga problema ni Osama.
Para sa iya, indi ang pangalan ang makahatag sang kahulugan sang kabuhi sang isa ka tawo kundi ang iya mga maayo nga hinimuan.
Ari pa gid ang pinakamakakilibot, kay ang iya utod ang ginpangalanan nga si Saddam Hussein.
