TIGBAUAN, ILOILO – May yara na sang suspek ang mga otoridad may kaangtanan sa kamatayon sang 16 anyos nga dalagita sa Brgy. Supa, Tigbauan, Iloilo.
Sa interview sang Bombo Radyo kay Police Major Rolando Araño, hepe sang Tigbauan Municipal Police Station, iya ginpahayag nga may yara sang mga ebidensya nga makatudlo kun sin-o ang suspek sa krimen nga una nga nagguwa nga isa ka suicide incident.
Wala lang ginhingadlan ni Araño ang identity apang suno sa hepe, indi man lang magliwan sa biktima ang nasambit nga suspek.
Ipatawag ni Araño ang mga himata sa tion nga malubong na ang16 anyos nga dalagita agud istoryahan ang development sa kaso.
May kaangtanan sa apat ka asud-asud nga suicide incident sa banwa sang Tigbauan lakip na diri ang natabo sa Brgy. Supa, ginpahayag ni Araño nga may yara sang ginpirmahan nga Executive Order si Mayor Suzette Alquisada.
Nakasaad sa Executive Order 2020-40 nga pirmado ni Alquizada nga nagakadapat nga magtukod sang mental health help desk sa tagsa ka barangay kun sa diin si Dr. Jeffrey Rivas, Municipal Health Coordinator kag ang 52 ka Sangguniang Kabataan chairman amo ang magapanguna sa nasambit nga proyekto.
