Masobra na naman sa P1-million ang balor sang iligal nga droga ang nakumpiskar sa Iloilo City pila ka adlaw antes ang sinakuay sang mga aktibidad para sa Dinagyang Festival.
Sa drug buy bust operation nga ginpatigayon sa Valeria St., Barangay Kauswagan, Iloilo City Proper subong nga gab-i, arestado ang mga subject nga sanday alias JR, 43, sang Rizal Pala-Pala 2; kag si alias Ryan, 36, sang Tanza Bonifacio, City Proper.
Sa interview sang Bombo Radyo kay Pol. Lt. Col. Antonio Benitez, head sang City Drug Enforcement Unit, iya ginpahayag nga 23 ka sachets sang suspected shabu ang kabug-usan nga recoveries nga may ginabanta standard drug price nga P1.7-million.
Ginapatihan nga kabahin pa ini sang plano kuntani ipalusot para sa Dinagyang Festival sa syudad sang Iloilo.
Suno kay Benitez, duha ka semana ang monitoring sang kapulisan sa duha ka mga lalaki antes natpatigayon ang operasyon.
Pareho nga natumod ang duha ka subject nga high value individuals.
Si alias Ryan ang ginapahayag may kaso anay nga frustrated murder apang naserbisyuhan niya ini; samtang si alias JR naman ang may kaso man anay sa pagpangawat kag may kaso man sa iligal nga droga apang nakaguwa paagi sa plea bargaining agreement. #
