Gin-aprubahan na sa ikaduha nga pagbasa sa Senado ang hagna nga ginduso agud nga pasakaan sang P100 ang daily minimum wage sang workers sa pribado nga sektor sa bilog nga pungsod.
Natabo ini eksakto isa ka semana matapos nga gin-sponsor ni Senator Jinggoy Estrada sa plenaryo ang Senate Bill 2534 ukon “An Act Providing for a 100 Pesos Daily Minimum Wage Increase for Employees and Workers in the Private Sector”.
Ini nga hagna ang produkto sang madamo man nga hagna nga nagaduso sang saka sa sweldo lakip na ang iya ni Senate President Juan Miguel Zubiri kun sa diin P150 across the board increase gid sa minimum wage sang workers sa private sector ang ginahingyo.
Sang nagligad nga tuig, matandaan nga nag-isyu sang wage orders para sa saka sa mininum wage sa empleyado sa Northern Mindanao, Zamboanga Peninsula, Cagayan Valley, Central Luzon, SOCCSKSARGEN, Central Visayas, kag iban pa.
Naghingyo man si Zubiri sa Kamara nga magpasar man sang kaangay nga hagna.
“Kapag naipasa na po namin ito, we are appealing to the House of Representatives na sana i-take up po nila itong measure na ito, because we feel that it’s time t help our workers, ang ating mga manggagawa, na itaas ang minimum wage lalong lalo na sa Visayas at Mindanao,” suno kay Zubiri.
Antes sini, nauna na si Representative Stella Quimbo, vice chairperson sang appropriations committee, kag Rep. Joey Salceda, head sang ways and means panel, sa pagpahayag sang ila nga pagpangduha-duha sa legislated wage hike.
Ang duha ka mamalidha ang nagsiling nga pareho ini nga mag-resulta sa pagsaka sa presyo sang produkto kag mga serbisyo kag posible man nga maapektuhan kag ma-shutdown ang small and medium enterprises.#
