ILOILO CITY – Nagdangat sa P250 million ang initial nga budget nga kinahanglanon agud nga makay-o ang bag-o nga Ungka flyover.
Sa interview sang Bombo Radyo kay Engr. Adam Abinales, Chief Executive Officer sang Abinales Associates Engineers Plus Consultants nga amo ang nagpatigayon sang geotechnical investigation sa Ungka flyover, iya ginpahayag nga base sa ila nga ginrekomendar nga scheme, kinahanglan nga kuhaon ang haligi sa piers 4, 5, kag 6 kag butangan sang dugang nga mga bored piles sa nasambit nga mga piers nga nakitaan sang pag-usmod.
Magluwas pa sini, ginrekomendar man sang third party consultant ang pagkakas sang mga girders nga nakatungtong sa amo man nga mga piers agud nga mahatagan sang ligwa ang pagbutang sang bored piles nga nagadalum sang 40 meters ang kada isa.
Suno pa kay Abinales, sa pagkay-o sang flyover, kinahanglan nga maggamit sang mga heavy equipment.
Posible nga masuguran ang pagkay-o sang flyover sa masunod nga tuig bangud nga mangita pa sang pondo ang Department of Public Works and Highways.
Magalawig naman sang 10 ka bulan ang pagkay-o sang flyover.
Bangud dako nga budget nga kinahanglan, posible nga sa katapusan nga bahin sang 2024 ukon sa Dinagyang Festival 2025 pa mahimo nga magamit sang publiko ang Ungka flyover.
