Gintilawan ang ikasarang sang 29 ka rescuers sa pagpangita kag pagluwas sang mga indibidwal nga na-trap sa naguba nga building kadungan sang final exercise sang Collapsed Structure Search and Rescue (CSSR) Training sang Office of Civil Defense (OCD) VI sa Villa Juanita Subdivision, Pavia, Iloilo, subong nga Sabado, Oktubre 17.
Ini nga mga participants naghalin sa nagkalain-lain nga Provincial Disaster Risk Reduction and Management Offices (PDRRMO) kag volunteer groups sa Western Visayas nga nag-agi sa pito ka adlaw nga training.
Sa interview sang Bombo Radyo kay James Ultim Benares, Search and Rescue Instructor, iya ginpahag nga ginhiwat ang training agud mapreparar ang mga rescue team sa pagresponde sa mga insidente sang naga-collapse nga mga building kag iban pa nga estruktura ilabi na sa tion sang linog.
Sa final exercise, duha ka grupo sang rescuers ang nagpatigayon sang search and rescue operation sa gin-simulate nga nag-collapse nga building bangud sang linog.
Pinaagi sini, ginapasanyog ang kaalam, teknikal nga ikasarang, kag preparasyon sang mga rescuers sa pag-atubang sang mga emerhensya kag kalamidad.
Text by: Bombo Jay Panizales
