Ginkumpirma sang Pavia Municipal Police Station nga nakit-an ang presensya ni Frank Rois Barbasa sa sulod sang Greenmeadows Subdivision sa Brgy. Ungka I, Pavia, Iloilo sang gab-i antes nasapwan ang sunog nga bangkay sa kilid sang pader sa amo man nga subdivision.
Sandig ini sa closed circuit television (CCTV) footages nga nalantaw na sang kapulisan apang ginahulat pa nga ma-extract.
Sa interview sang Bombo Radyo kay Police Captain Ritz Field Presquito, ang hepe sang Pavia Municipal Police Station, yari ang pila ka mga hitabo nga nagguwa sa ila imbestigasyon may kaangtanan sa pagkadula ni Frank Rois:
- 5:03 sang hapon sang Martes, Abril 28, naghalin si Frank Rois sa ginatiniran sini nga balay sa Barangay Caingin, La Paz , Iloilo City sakay sa blue Suzuki Sedan nga Grab car. Suksok sini ang itom nga t-shirt, maong pants, kag may dala man nga back pack.
- Ginabulubanta 5:30 sang hapon sa amo gihapon nga adlaw, nakaabot si Frank Rois sa distrito sang Mandurriao agud hapitan ang iya nga abyan
- 8:19 sa gab-i sang amo sa gihapon nga adlaw, liwat ini nga nagsakay sa Grab car sa Barangay Hibao-on, Mandurriao
- 8:27 sa gab-i, nakaabot si Frank Rois sa GT Town Center sa Pavia nga nagaisahanon
- 8:52 sang nakita ini sa CCTV sa sulod sang subdivision nga nagalakat-lakat samtang naga-isahanon gihapon
Sandig sa inisyal nga impormasyon, sang amo nga oras, may backpack nga dala si Frank Rois, may ginauyatan nga softdrink, kag may isa pa gid ka paper bag.
Wala makit-an sa CCTV footage nga nakaguwa siya liwat sa amo nga subdivision.
Wala man ginkumpirma sang pulis kun sin-o ang iya ginkadtuan sa amo nga subdivision, apang nauna na nagguwa ang impormasyon nga taga-didto ang iya ex-girlfriend.
Suno sa hepe sang pulis, malapit na lang nila matapos ang backtracking sang mga CCTV footages.
Wala pa natumod ang identity sang sunog nga bangkay nga nakit-an sa kilid sang pader sa amo nga subdivision sang Myerkules sang kaagahon, Abril 29, apang nagagwa ang pangalan ni Frank Rois bangud nga iya I.D. ang nakit-an malapit sa area kun sa diin nakit-an ang bangkay.
Tubtub subong, indi pa makontak sang iya pamilya si Frank Rois.
Isa ini ka graduating nursing student sa isa ka unibersidad sa Iloilo City, tumandok sang Capiz, apang temporaryo nga nagatiner sa La Paz, Iloilo City.
MA-‘DND’ SANG ISA KA SEMANA?
Nakamuno pa anay si Frank Rois sa iya abyan nga ma-DND ini ukon maga-‘Do not Disturb’ mode sa sulod sang isa ka semana kag magabalik nga mas mabakod.
Ginkumpirma man ini ni Police Captain Presquito nga nagguwa man sa ila nga imbestigasyon.
Ang DND amo ang setting sa cellphone nga kun naka-“on”, indi makabaton ang tag-iya sang phone sang ano man nga mensahe, tawag, ukon ano man nga notification.
Suno kay Presquito, nakapanugid si Frank Rois sa iya abyan nga gina-isyuhan siya sa Roxas nga sugarol kag madamo sang kautangan.
Indi pa matumod sang pulis kun may kaangtanan ini sa iya pagkadula, apang padayon ang pagtipon sang CCTV footages.#
