Nagasanto sa kataason ni Frank Rois Barbasa ang height sang sunog nga bangkay nga nasapwan sa kilid sang pader sang Greenmeadows Subdivision sa Barangay Ungka I, Pavia, Iloilo.
Ginkumpirma ini ni PCapt. Ritz Field Presquito, hepe sang Pavia Municipal Police Station.
Suno kay Presquito, yara sa 5’10 tubtub 5’11 ang height ni Frank Rois kag sa inisyal nga pagtan-aw sa ginapatigayon nga autopsy sa bangkay, yara ini sa ginabulubanta 5’10.04
Una na nga nagsiling ang kapulisan nga posible nag-shrink ukon nagkupos ang lawas bangud ini ang nasunog.
As of this writing, wala pa natumod ang identity sang sunog nga bangkay nga nakit-an sang alas kuatro sang Myerkules sang kaagahon, Abril 29, apang nagagwa ang pangalan ni Frank Rois bangud nga iya I.D. ang nakit-an malapit sa area kun sa diin nakit-an ang bangkay.
Tubtub subong, indi pa makontak sang iya pamilya si Frank Rois.
Isa ini ka graduating nursing student sa isa ka unibersidad sa Iloilo City, tumandok sang Capiz, apang temporaryo nga nagatiner sa La Paz, Iloilo City.
Una na nga ginpahat-pahat sang Pavia Municipal Police Station nga nakit-an man ang presensya ni Frank Rois sa subdivision sang gab-i antes nasapwan ang bangkay.
Yari ang pila ka mga hitabo nga nagguwa sa imbestigasyon may kaangtanan sa pagkadula ni Frank Rois:
- Tres minutos makaligad sa alas singko sang hapon sang Martes, Abril 28, naghalin si Frank Rois sa ginatiniran sini nga balay sa Barangay Caingin, La Paz , Iloilo City sakay sa blue Suzuki Sedan nga grab car.
Suksok sini ang itom nga t-shirt, maong pants, kag may dala man nga back pack.
- Ginabulubanta 30 minutos makaligad sa alas singko sang hapon sa amo gihapon nga adlaw, nakaabot si Frank Rois sa distrito sang Mandurriao agud hapitan ang iya nga abyan
- 19 minutos makaligad sa alas otso sa gab-i sang amo sa gihapon nga adlaw, liwat ini nga nagsakay sa grab car sa Barangay Hibao-on, Mandurriao
- 27 minutos nakaligad sa alas otso sa gab-i, nakaabot si Frank Rois sa GT Town Center sa Pavia nga nagaisahanon
- Otso minutos antes ang alas nueve sang gab-i, nakita ini sa CCTV sa sulod sang subdivision nga nagalakat-lakat samtang naga-isahanon gihapon.
Sandig sa inisyal nga impormasyon, sang amo nga oras, may backpack nga dala si Frank Rois, may ginauyatan nga softdrink sa isa ka kamot, kag may isa pa gid ka paper bag sa isa ka kamot.
Wala makit-an sa CCTV footage nga nakaguwa siya liwat sa amo nga subdivision.
Wala man ginkumpirma sang pulis kun sin-o ang iya ginkadtuan sa amo nga subdivision.
Nakapanugid man ang abyan ni Frank Rois nga antes ini nadula, naka-muno ini nga ma-DND anay ukon “Do Not Disturb” mode kag magabalik lang matapos ang isa ka semana.#
