Gin-aprubahan na ni Presidente Rodrigo Duterte kag sang iya gabinete ang pagbalik sa byahe sang mga provincial buses nga may point-to-point nga ruta.
Suno kay Presidential Spokesperson Atty. Harry Roque, pinaagi sa pagpasugot sang byahe sang mga bus padulong sa tagsa ka probinsya, mabuligan man nga makabangon ang ekonomiya sang pungsod nga nagsarurot bangud sa COVID-19 pandemic.
Ang nasambit nga lihok ang aprubado naman sang Land Transportation Franchising and Regulatory Board (LTFRB) kag sang local government unit nga amo ang destinasyon lakip na ang ila stop-over/transit terminals.
“Point-to-point provincial buses shall be allowed unhampered passage through the different LGUs en route to the LGU of destination,” pahayag sang inter-agency task force against COVID-19.
Ginpahayag ni Roque nga nagakadapat nga hulaton anay ang mga pagsulundan nga ipagwa sang Department of Transportation kag LTFRB kaangot sa nasambit nga lihok.
“Hintayin lang po natin ang guidelines na ilalabas ng DOTr (Department of Transportation) at LTFRB ukol dito,” pahayag ni Roque.
Matandaan ng sang Marso, ginsuspende sang otoridad ang tanan nga sahi sang public transport.
